Si Palui: Bulih Bini 2

PARKAMBANGAN zaman wayahni, tarmasuk guru-guru di sakulahan Palui iya jua harus umpat parkambangan zaman wan teknologi. Kalau sarba kada bisa labih baik mundur ja jadi guru.

”Ikam Lui kusuruh palatihan 2 hari Jumahat wan Sabtu, bapisah wan binilah, sudah nitu habis ai,” ujar kapala sakulah (kepsek) ka Palui.

“Palatihan apa pak kepsek?” takun Palui pina takajut.

“Palatihan paningkatan disiplin guru zaman now,’ sahut sidin sarius.

“Ayuha apa bulih buat ulun tarmasuk guru nang parlu ditingkatakan kadisiplinannya iya kalu, pak kepsek jadi pian manyuruh ulun?” singgung Palui langsung.

“Iya banar Lui ai, jadi tahu di sana dijalasakan urang banar arti disiplin guru-guru, kena ikam manularakan ilmu pulang ka sakulahan ni, tarmasuk aku parlu jua ikam informasikan,” sambat kepsek.

“Inggih ayuha pak kepsek ai,” jawab Palui.

Di rumah Palui bapadah ka bininya, bahwa Jumahat Sabtu mangikuti palatihan guru di Banjarbaru, maka jam 07.30 wita sudah mulai acaranya. Matan kamarian ni umanya ai, aku handak berangkat ka Banjarbaru, jadi kada apa-apa dahulu malam Jumahat ni,” ujar Palui ka bini.

“Inggih kada apa-apa jua nah?” sahut nang bini.

“Pas haja,” ucap Palui, bininya himung.

Pendek kisah Palui sampai di Banjarbaru mangikuti palatihan .”Isuk te umanya ai aku pukul 4 kamarian sudah ada di rumah,” Palui via SMS ka bini.

“Akur banar abahnya ai, untung ha lakas haja palatihannya kada sampai saminggu,” balas nang bini.

“Siapakan umanyalah, lapangan ikam, pesawat handak mandarat malam Minggu ya?” lanjut Palui.

“Oke abahnya ai,” jawab nang bini, asa baampik Palui dalam hati.

Sakitar jam 5 kamarian hari Sabtu Palui sudah sampai di rumah, himung nang bini manyambut laki (ini bini nang baik, kada langsung mangakui lapangan basah) jadi jar nang anak, papa datang mambawa pambukaan puasa.