Si Palui: Is Cindul

BANJARMASINPOST.CO.ID - PA-KAI-AN wan paninian Palui panjang umur. Nang Kai baumur 80, sadangkan nang nini (bini kai) 75 tahun. Amun ada nang batakun awan kai, Napa rahasia panjang umur sidin. Ujar kai jangan pagat hinak wan jangan bahutang. Sabab mun kita ada hutang wan urang sadikit- banyak pasti jadi pikiran.

Apalagi mun sudah bajanji babila waktu mambayarnya, pas jatuh timpu kita kada kawa babayar, nitu nang maulah kita kipuh kada karuan rasa; ada rasa supan, rasa basalah, rasa kasal awan diri, jua asa randah diri awan urang. Pukuknya rasa balisah tu pang. Salah-salah bisa mangalang guring wan makan asa kada baliur. Makanya bujur banar napa nang jar kai nitu, mun kawa ‘jangan bahutang’ !

Suah waktu puhun kamarian kai umpat duduk di gardu, di situ kabatulan takumpulan babarapa anak muda. Kada saapa ada kawan anak-anak muda nitu liwat basapida mutur hanyar mangkining, inya malambai kaalah kakawanannya nang di gardu sambil mambunyiakan kalaksun.

“Hann....,” jar buhan anak muda nitu manggayai kai. “Urang pulang nang basapida mutur hanyar. Pian pang pabila, kai ?!”

“Aku tu, jar kai, “asal nini nang di rumah hakun balului, inshaa Allah tatunggang haja tu jua kaya urang.”

“Wah....! Kai ngumung parnu!”, jar anak muda nitu tatawaan.

“Parnu napa?!”, jar Kai. “Maksudku, asal nini nang di rumah hakun balului galang gasan dijual, inshaa Allah mun sakadar sapida mutur tatukar haja jua. Cakadanya balului tapih pang buhannya-ai,“ jar kai tatawa.

Kai wan nini Palui tu tinggal baduduaan haja lagi di rumah. Anak-anak sidin sudah barumah asing-asingnya. Si kai sudah lawas pangsiun matan pagawai panarangan, jadi sidin kada napa-napa lagi diulah. Paling-paling manuntun TV, mambaca surat kabar, atawa mun kada sidin asyik manyatil radiu RRI nang manyiarakan hiburan lagulagu karuncung kasukaan sidin.

Mun sudah siaran lagu-lagu karuncung tu, kai hakun haja sampai taguring-guring manikmatinya. Jaka kada radiu dimati-i ulih nini, kai kada tabangun.
“Haww.. kanapa radiunya maka dimati-i !?” takun Kai.

“Karuncungannya sudah lawas habis,” sahut Nini.

Kai asa kada parcaya awan pandiran Nini, lalu sidin mangatik pulang mahidupi radiu. Sakalinya nang tadangar; siaran barita manganai hujan ekstrim nang sadang malanda Jakarta.

“Uma-ai untungnya urang di Jakarta, jar Nini, ‘is krim’ kada batutukaran lagi!”

“Hujan ekstrim!, Ni-ai, jar Kai sambil tatawa, “cakadanya hHujan es krim’ pang.”

“Iiihh..., pandangarku hujan is krim,” jar Nini sambil bajalan ampah ka dapur.

“Andika handak ka mana, ni?!” takun Kai.