Si Palui: Buang-Buang Waktu

WAKTU nang tarus bajalan kada manunggu manusia nang suka bamalasan. Siapa-siapa suka bamalasan alamat tatinggal wan ditinggalakan urang. Musuh kita nang numur satu adalah buang-buang waktu, ujar pambakal ka Palui wan kakawalannya.

“Napa maksudnya pambakal nitu?” takun Palui.

“Kalau kawa digawi hari ini, gawi hari ini jua, jangan sampai taka isuk,” jawab pambakal.

“Uh damintukah pambakal, makanya wayahni pina babanyaklah, jumlah pagawai di kantur desa,” sambat Garbus.

“Bujur Bus ai, ada tambahan lima urang pagawai di kantur desa, nang anum-anum kupilih, supaya lakas wan capat malayani warga masyarakat,” sahut pambakal, manggut-manggut Palui wan kakawalannya.

Bulik ka rumah Palui rami bapanderan wan bininya.”Apa abahnya rami bapanderan wan pambakal masalah apa?” takun nang bini.

“Pambakal barharap banar kapada saluruh warga agar jar sidin jangan buang-buang waktu haja nah,” sahut Palui.

“Buang-buang waktu nitu napa maksudnya?” takun nang bini.

“Nitulah kabanyakan nang dilakukan ulih warga kita naya, cuntuh jar sidin daripada baungut, itu artinya buang-buang waktu iya kada?” jalas Palui.

“Napa nang digawi abahnya?” bini Palui masih bingung.

“Nang digawi jaka betanam dapur hidupkah di halaman rumah. Cuntuh betanam tumat, tarung, lumbuk,” ujar Palui.

“Ayuja kena ulun manukar bibitnya di pasar,” sahut nang bini.

Kamariannya Palui imbah salat Asar kanapa maka Palui taguring.

”Uh abahnya bibit tanamannya sudah ulun tukarakan, tapi kanapa pian guring, nitu ngarannya buang-buang waktu pian. Hah umung kusung haja, jangan buang-buang waktu, sakalinya sorang nang mahuluakan!” bini Palui ketus banar.

Mangaruh Palui taguring, ngalih banar digarak, kanapakah katuju banar guring kamarian imbah salat Asar, sudah haja dipadahakan nitu kena akibatnya bisa mangalilu!” bini Palui gagarunum.