Kapamalaran Palui

BANJARMASINPOST.CO.ID - KAMARIAN itu imbah sambahyang asyar Palui duduk di warung pakacil Udin mahadangi kakawalannya. Inya sudah bajanji handak mambayariakan karna dapat

duit dibari pambakal. Palui singhaja mahadangi di warung acil Udin karna di situ hanya warung nginuman, sadangkan di warung acil Irus di samping nginuman ada jua bajual nasi wan katupat. Kada lawas bubuhannya datangan manamui Palui.

“Napa maka ikam mahadangi di sini Lui, padahal kabiasaan kita musti di warung acil Irus,” ujar Garbus.

“Aku handak maubah rasa Bus ai,” ujar Palui.

“Hi-ih aku tahu alasan Palui mambawai kita nginuman di sini karna inyalah nang mambayari dan di sini pasti himat pada di warung acil Irus,” ujar Tulamak paham.

“Alasanku kada karna itu Mak ai, di warung acil Irus itu kabanyakan urang makan nginum hingga ngalih bapander wan kada kada sawat manggayai sidin,” ujar Palui badalih.

“Ayu lakasi pasan tasarah ikam haja,” ujar Palui manyuruh.

“Aku nginum teh susu,” ujar Garbus.

“Sama aku pasan teh susu jua,” ujar Tulamak.

“Aku pasan kupi haja, kupi kantal dan likat,” ujar Palui.

“Ikam cangkir ganalkah atawa cangkir haluskah Lui?” ujar pakacil Udin.

“Napa bidanya cangkir halus wan cangir ganal cil?” ujar Palui batakun.

“Kabiasaan urang bila nginum kupi ong alias kupi kantal pasti cangkir halus karna cangkir halus kupinya batukup dan cangkirnya batangkai. Sabalum rasap banar uap bau kupinya maka jangan dibuka tukupnya, supaya harum dan sigar,” ujar acil Udin.

Imbah manyambut kupi cangkir batangkai itu, bubuhannya asyik bakisah ka hulu ka hilir, Palui babarapa kali mambuka tukup cangkirnya handak maitihi apakah kupinya sudah dingin dan kawa dihirup. Lalu sambil maniup-niup kupi nang masih bakukus Palui banafsu banar handak mahirup sambil jari tangannya mulai mamasukakan ka tangkai cangkir. Rupanya karna cangkirnya masih panas maka jarinya tapaksa bagancang maingkuti.

“Himung banar Lui aku malihat ikam wayahini katuju nginum kupi, padahal ikam kada paruku,” ujar Garbus.