Si Palui: Ganti Rugi

Editor: Alpri Widianjono

BANJARMASINPOST.CO.ID - Basungsungan hari sudah tumbur kampung, maraga ada nang manyatuk lonceng di gardu ronda. Malihat banyak urang bakumpul Tulamak umpat jua bakajal.

Sakalinya kada urang lain jua nang maabuti kampung, kada lain pada Garbus kawalnya jua.

“Kita sabarataan warga di kampung ini harus basatu malawan katidakadilan, pamarasan apalagi kolusi wan korupsi,” ujar Garbus ba-apiapi bapidatu dihadapan warga kampung.

“Bus ui Garbus!” ujar Tulamak.

“Kanapa maka ikam pina mahahing bapidatu dihadapan warga sa-RTan,” ujarnya managur.

“Aku sudah pusang, kada tahan lagi ma-arit sarik karna kita sa-RT-an sudah dibunguli Palui,” ujar Garbus.

Baca juga: Si Palui: Hilim Satandar

Baca juga: Si Palui : Kada Basalawar

“Cuba ikam kisahakan bujur-bujur napa pungkalanya mulai pamulaan sampai habis, jadi kami kada takajut-kajut kalu ikam pina manyarik-nyarik bapidatu,” ujar Tulamak malamahi.

“Itu nah..... si Palui katua RT, kada dikira urangnya lamah lambut tapi nyatanya sudah manipu kita sabarataan, inya mangorupsi duit kita. Dahulu kita dimintanya supaya basadia malapas tanah halaman rumah kita sakitar satu sampai dua meter gasan maluasi jalanan. Lalu kita sabarataan manyanggupi, tapi dengan janji harus ada ganti ruginya,” ujar Garbus.

“Bujur haja, usulan Palui itu dan kita sabarataan sudah manyanggupi, sudah manandatangani parjanjian ganti rugi diatas materai.” jawab Tulamak.

“Wah.......Tulamak kada kawa dibawa barunding karna inya mambila Palui. Maaf Mak-lah, mungkin ikam sudah tamakani jua duit korupsi Palui gasan ganti rugi tanah halaman,” balas Garbus.

“Bus, basabarlah..... Itu nah si Paluinya datang, ayu kita takuni bujur-bujur, siapa nang salah siapa nang bujur,” ujar Tulamak.

“Lui, bung Palui!” ujar Garbus pina sarik.

Baca juga: Si Palui: Tapakai Mintuha

Baca juga: Si Palui: Bacalon Anggota DPR

“Ikam Lui ai dasar talanjur purun manipu warga sa-RT-an. Ikam manyalahgunakan jabatan lalu mangarupsi duit ganti rugi tanah, ikam bantas saurangan. Kami handak tahu, kaya apa cara ikam mahitungnya,” ujar Garbus sambil bakacak pinggang.

“Sabar, sabaaaarrr... Bus,” ujar Palui.